Lebanon24

نشر الممثل الكوميدي جان بو جدعون على حسابه الفيسبوكي نصاً لوصية الموسيقار الراحل ملحم بركات وتحديداً لما كان سيقوله للعماد ميشال عون، إذا ما انتخب رئيساً يوم الإثنين المقبل، جاء فيه:

"وصيتي..

كنت حابب شوف الجنرال عم يعلن ولاء القسم

الجمهوري.. وأضربلو التحيّة

كنت حابب اشرب كاسو وسلّم عليه وهنيه..

كنت حابب شوف لبنان كيف بدّو يزهر ع ايّامو

كنت حابب بعهدك يا جنرال ترجّع لهالبلد اللحن، والكلمة، والصوت..

كنت حابب شوف هالارزة ع جبينك كيف بدها تعلى..

جنرال بدّي وصيك.. اذا استلمت هالكرسي لزّقها بـ... عمول معروف.. وما تعطيها لحدها.. مش كرمال شي.. كرمال ولادنا.. كرمال مستقبلن.. كرمال ترجعّلنا صورتنا يللي تهّمشت.. كرمال تقطّش ايدين الحراميي، والنصابين يللي عم يسرقو مالنا وعرقنا..

كرمال تعلّق هالمشانق.. تننام وبوابنا مفتوحة..

جنرال يطوّل بعمرك.. العمر بهالدني قصير يا ريتك جيت من عشرين سنة كان وديع وصباح وسمير يزبك تكرموا ع ايامك..

كِنّا ردينا لهالتلفزيونات الـ.. هويتنا الحقيقية.. مش كل واحد فاتح دكان ومحطة وعم ببيع..

والممثلين والفنانين يللي بيفهمو، والمواهب الحلوة معتّم عليها..

معليش انا بسامح كل هودي الصحافية والقُرَط يللي وسخو بحكيون عنّي انا وطيّب.. الله يغفرلن..

جنرال مشواري بهالدني كان قصير.. بطلب منّك تشرب كاسك... تعلّي كاسك.. وتخلّي كاسك عالي كتير..

بوصيك بعيلتي انتبهلي علين وع ولادي..

ببوس..

علّم هالاجيال شو يعني الوطنية

بلكي بيتركوا هالـATV وبيوقفوا ع اجرين.. هالمزرعة يللي نحنا فيا ما بقى تحمل.. لا بالسواقة ولا عالطرقات ولا بالموليت ولا بالدواير الرسمية ولا بمراكز الدولة..

جنرال انت البي.. انا شايفك من فوق.. وما ترحم حدا.. بهديك تاريخي.. وصوتي.. وقلبي.. وكل المجد الك من ابو مجد..

بخاطرك."